My Nursery Poems

May manok akong bukay,
Ginbueang ko sa Ibajay;
Nagdaug pero patay.
Ginsumsuman ni Nanay

***

Buean, buean,
Taw-i ako’t humay;
Sa Hong Kong si Nanay,
Sa Saudi Arabia si Tatay.

***

Lunes, Martes, Merkules
Rang Tatay hay Hercules;
Hwebes, Byernes, Sabado,
Rang Nanay hay owa’t ginasanto.
Pero kon Dominggo, gasimba kaming tatlo!

***
Inday, Inday
Siin ka nagbaeay?
Sa Boracay, sa Boracay
Abu rito nga sigay.

***
Saea, daywa, tatlo
Mahinay  kuno rang ueo
Imaw ra nga ginpingot ako
Ka maaeam nga maestra ko

***
Uean, uean, uean
Ham-at ginbuhuan mo ro among daean?
Ahay, Toto, gininspeksyon ni kongresman
Ro prohekto igto sa hotel, owa sa daean.

***
Antiyamis, antiyamis
Siin ka naghalin?
Ring mga buto nagatinangis,
Nagutom eon sanda siguro.
Igto sa sanga't santoe
Nag-usoy it ueod
Agod ihungit sa mga buto ko.

***

Inay, Inay Siin Kita Matueog?

Dec. 28, 2019

Inay, Inay, siin kita matueog?

Hinukwa gid abi ni Bagyo Ursula

Ro bubongan ku atong kwarto

Ku Paskwa.

Iya eang anay kita sa sala

Samtang ginakaayad ro atong bubongan

Ni Tatay mo.

***

Uean, Hangin Paeayo
Dec. 28, 2019

Uean, hangin
Paeayo, paeayo.
Nagkaeuka eon ro among narra;
Pati ro among bubongan nagkaeapok;
Pati ro among paeay sa kaeanasan nagkaeaeumos.
Gusto eon gid namon ni Inday magkaroling.
Balik ka eang galing sa Hunyo
Pero indi eang magpareho pareho kay Ursula o kay Yolanda.